Sofriind del sucçeß — DemLiv sint fatigats da gagnhar

Els Democrätici Livereschti s’aflent in ün crisi vierital nútemp — lor voteirs quarfent, es ocså lor membreux sint unfaþis àð encuntrar. La raziun: els DemLiv tiennent estescu simplămint tro riuschlats per lor propreu ben, acavind toct lor goais politici es pü ja dels anneux.

Dürånt l’eleziun la phü recént, els DemLiv fostevent enrexhistrar ün list da candidätsilor xhointeu cün els vells soçis dal co·aliziun parç q’hi non estevent aßei dels ints in lor propră esqipă. Com’el cäps actüell da noastra Grült Voiçì en ziradra, os sint fatigats da gagnhar. Os gagnhevent så mült, es zespitzi q’els voteirs plörevent "Perf, perf, c’e tro da gagnhar, noi non povent preindar-en ingen mhor. S:dă Seneschal, c’e tro," la respuns füt "Non c’e, noi fossent restar gagnhind. Noi fossent gagnhar da phü." Ainda q’os pierdevent ünă eleziun, níþil non put sterminar-lor. Ocså la 58:éă es la c'haosös 59:éă Cosă, nútemp ’n memoraziun distantă es malprüvadă, non pognhevent renverçar la tendençù.

C’e’n neonac'hă q’els DemLiv non sint el prüm parti qi sofria d’iensă eiceßă del sucçeß: els Laits Radicais (solămint els púschasters vrätsilor viennent reconéiçar această nómină) rencontrevent ünă zestzinà similar. Aglhorc, salacor, la soluziun estadra mamtenençar dels expectaçais bätsilor es dals revoluziuns raes. Oviösmint c’e pü unfáþil à façar aicì parç qe dels eleziuns sint muiteu pü comuns (j’ont circa 6 eleziuns xhenerais dürånt qator anneux aicì anstadă da... viensă in las EVA), mas schi si non volt zepletar toct sieux topici es ißüns, si fost zeviénar ün mestreu dal gaspiglhadă del temp. Schnögnhetz es cultivetz el hype, com’iens studieu independent del svilup da videoxhuns. ¡Put-estar ça funziunarha!